கண்ணின் மணியைக் காதல் மொழியைக்

காரிருள் அகத்தைக் கசக்கும் சொல்லைக்

கானக உயிர்களைக் கடலின் அலைகளைக்

குயிலின் கானம் கிளியின் பேச்சை

 

தத்தி தவழும் கிள்ளை அழகைத்

தாவிடும் மானின் துள்ளல் அழகைத்

தாளம் போடும் விரல்களின் அழகைத்

தாகம் தீர்க்கும் அருவியின் அழகை

 

வாக்கு தவறும் கயவர் கருத்தை

வாகாய் வளையும் மனிதர் உளத்தை

வணங்கும் தலைவர் ஆற்றல் அறிவை

விரித்துப் பறக்கும் பறவை இறகை

 

வார்த்தை தவறும் நொடியின் கணத்தை

வைரமாய் பாடும் வரிகள் கனத்தை

வீழ்த்திப்  போகும் குளிர் காற்றை

வளமாய் வாழும் வாழ்க்கைத் தரத்தை

 

வாழ்த்திப் பாட வேண்டுமே கவிதை

வைது பாட வேண்டுமே கவிதை

வீழ்த்தலை அறுக்க வேண்டுமே கவிதை

வாழ்தலை ரசிக்க வேண்டுமே கவிதை !