டிசம்பர் 7, 2019 இதழ்
தமிழ் வார இதழ்

தாயென தமிழ்நாடு பிறந்த நாள் ! (கவிதை)

வழக்கறிஞர். ம. வீ. கனிமொழி

Nov 2, 2019

siragu tamilnadu

 

 

கலைகளின் நாடு தீரத்தின் வீடு

கன்னல் சாற்றின் மொழியது பாடு

காலம் கனியும் தென்றல் வீசும்

கீழ்வானம் சிவந்து மாரி பொழியும்

 

எழில் ஓவியமாய் காலமகள் வரைந்த

ஏட்டின் பக்கங்கள் வரலாறு படைக்க

ஏற்றமிகு மிடுக்கோடு பாரில் ஒளியேற்றி

எவ்வம் துடைத்திட்ட சில்லெனும் தூறலாய்

 

தூளியில் ஆடும் குழவியின் நெற்றியில்

மென்மை முத்தம் தந்தே களிப்பாய்

மகிழ்ந்து தவழ்ந்து பறந்து திரியும்

வானம்பாடி வண்ணமிகு மஞ்ஞை அழகோடு

 

நரம்பின் இசையாய் யாழ் ஒலிக்க

நாவின் ஓசை தமிழ் ஒலிக்க

நெல்லின் மணியாய் கண்ணின் ஒளியாய்

பைந்தமிழ் மணக்க தணல் வெப்பத்தில்

 

தமிழ்நாடு எனும் பெயர் உதித்த நாள்

தரணியில் தமிழ் தழைத்த நாள்

திராவிட முரசறைந்து கொண்டாட தமிழர்க்கு

தாயென தமிழ்நாடு பிறந்த நாள் !

 

போர்க்களம் காண காலம் துரத்தினாலும்

பயணத்தின் வலிகள் கால்கள் கண்டாலும்

பாலையின் வெம்மை முகம் தாக்கிட்டாலும்

பரந்த நிலமதிலிருந்து பகை துரத்துவோம்!

 

 

 


வழக்கறிஞர். ம. வீ. கனிமொழி

இவரது மற்ற கட்டுரைகளைக் காண இங்கே சொடுக்குங்கள்.

கருத்துக்கள் பதிவாகவில்லை- “தாயென தமிழ்நாடு பிறந்த நாள் ! (கவிதை)”

அதிகம் படித்தது