கலைகளின் நாடு தீரத்தின் வீடு

கன்னல் சாற்றின் மொழியது பாடு

காலம் கனியும் தென்றல் வீசும்

கீழ்வானம் சிவந்து மாரி பொழியும்

 

எழில் ஓவியமாய் காலமகள் வரைந்த

ஏட்டின் பக்கங்கள் வரலாறு படைக்க

ஏற்றமிகு மிடுக்கோடு பாரில் ஒளியேற்றி

எவ்வம் துடைத்திட்ட சில்லெனும் தூறலாய்

 

தூளியில் ஆடும் குழவியின் நெற்றியில்

மென்மை முத்தம் தந்தே களிப்பாய்

மகிழ்ந்து தவழ்ந்து பறந்து திரியும்

வானம்பாடி வண்ணமிகு மஞ்ஞை அழகோடு

 

நரம்பின் இசையாய் யாழ் ஒலிக்க

நாவின் ஓசை தமிழ் ஒலிக்க

நெல்லின் மணியாய் கண்ணின் ஒளியாய்

பைந்தமிழ் மணக்க தணல் வெப்பத்தில்

 

தமிழ்நாடு எனும் பெயர் உதித்த நாள்

தரணியில் தமிழ் தழைத்த நாள்

திராவிட முரசறைந்து கொண்டாட தமிழர்க்கு

தாயென தமிழ்நாடு பிறந்த நாள் !

 

போர்க்களம் காண காலம் துரத்தினாலும்

பயணத்தின் வலிகள் கால்கள் கண்டாலும்

பாலையின் வெம்மை முகம் தாக்கிட்டாலும்

பரந்த நிலமதிலிருந்து பகை துரத்துவோம்!