கிளிக்கூண்டும் அரசியலும் (கவிதை)
இல. பிரகாசம்Apr 14, 2018
கிளிக்கூண்டும் அரசியலும்
எத்தனைக் காலமடி இத்துயரம் -பின்னும்
இத்துயரம் நம்மைப்பின் தொடரவோ?
கூண்டில் அடைபட்ட சுகம்தான் -இன்னும்
கண்ணுக்கு ஒளியைத் தருவதோ?
வீதிவரை வந்ததடி துன்பம் -பின்னும்
வீடுவரை வாராது போகுமோ?
நின்சிறகு அசையாது போயின் -பின்னே
நீகாணும் உலகம்கை வருமோ?
சிறகிலும் உனக்குத் தெம்புண்டு -இன்னும்
சிறையில் வாசம் ஏனடியோ?
எதிரில் விரிந்த வானமுண்டு -பின்னும்
எதற்கு இத்தனைத் தயக்கம்?
கருத்துண்டு உனக்கென்று ஒன்று -இன்னும்
குரல்தான் காணலியே பேதையே!
உலகம் உனதடி பேதையே -பின்னும்
உறக்கம் தானோ உனக்கு?
கீழ்நோக்கும் பார்வை ஏதுக்கடி -பின்னும்
கீழே செல்லத்தான் நோக்கமோ?
(பெண்கள் அரசியலில் ஈடுபடுவது தேவை என்பதை வலியுறுத்தி)
இல. பிரகாசம்
இவரது மற்ற கட்டுரைகளைக் காண இங்கே சொடுக்குங்கள்.
கருத்துக்கள் பதிவாகவில்லை- “கிளிக்கூண்டும் அரசியலும் (கவிதை)”