விடியலைத் தேடும் மனங்களே, விரும்பக் கற்றுக்கொள்ளுங்கள்
ஆச்சாரிJan 4, 2014
● இந்த வாழ்வைக் கடந்து செல்லும்
ஒவ்வொரு நாளும்
என்னுடைய உணர்வுகள் ஒரு அகன்ற
விருட்சமாய் வளர்ந்து விரிகிறது.
● என்னுடைய மனதின் தாழ்வாரங்களுக்குள்
எல்லைகளற்று பரந்து கிடக்கின்றன
ஏராளமான கனவுகள்
ஓயாது ஆர்ப்பரிக்கும் கடலின் அலைகளாய்
எனக்குள் அவைகள் எழுவதும்
அடங்குவதுமாக
ஒவ்வொரு நொடியும் ஆர்ப்பரித்துக்
கொண்டிருக்கின்றன.
● இன்னும் வெளிப்படாத இரகசியங்கள்
ஒரு கடலின் அடியில் உறங்கிக்
கொண்டிருப்பதைப் போல
இப்போது வெளிப்படுத்துவதற்காய் எனக்குள்
வாழ்வின் இரகசியங்கள்
● மதிப்புமிக்கவைகளாய் இருந்தவைகள்
அனைத்துமே
மதிப்பிழந்து போய்விட்டன
மதிப்பில்லா ஒவ்வொன்றும்
அரியணையில் அமர்ந்திருக்கின்றன
● நியாய தருமங்கள் செத்துப்போன
காலங்களை
கடந்து கொண்டிருக்கிறோம் நாம்
உண்மைகள் எதற்கும் உதவாது என்று
உணர முற்படுகின்ற
ஒரு சமூகத்தில் வாழ்ந்து
கொண்டிருக்கிறோம் நாம்
● இந்த உலகம் பேராசையால்
மூடப்பட்டிருக்கிறது
ஒரே ஒரு மனிதனின் பேராசை
ஒரு சனத்திரளையே பெரும் துயரத்திற்குள்
தள்ளிவிட்டு
வேடிக்கை பார்த்துக் கொண்டிருக்கிறது.
● முட்கள் ரோசாக்களுக்கு வேண்டுமென்றால்
அழகாக இருக்கலாம்
பாதைகள் எங்கும் முட்கள் இறைக்கப்பட்டால்
பாதசாரிகள் என்ன செய்வார்கள்?
● ஒரு கொடுங் கனவிலிருந்து
வேர்க்க விறுவிறுக்க
விழித்துக் கொள்பவனை
ஆற்றுப் படுத்தவோ அணைத்துக் கொள்ளவோ
யாருமே இல்லை
அச்சுறுத்தும் யதார்த்தம் தான் மீண்டும்
அவனுக்குத் துணையா?
● எல்லா விதைகளும் முளைப்பது கிடையாது
முளைக்கும் எல்லாமும் வளர்வது கிடையாது
ஆனாலும் கூட எல்லாமும் முளைக்கவும்
எல்லாரும் வளரவும் விருப்பம்
வேண்டுமல்லவா?
● ஒரு இளம் பெண்ணின் இதயம்
ஒரு குழந்தையின் மௌனம்
ஒரு தாயின் கரங்கள்
ஒரு தோழனின் வார்த்தைகள் என
பேரன்பிற்குரியதாக, வசீகரமுடையதாக,
அர்த்தம் நிறைந்ததாக, வழி நடத்துவதாக
இருந்த எல்லாமுமே
ஒன்றுமில்லாததாக மாற்றப்பட்ட பின்பு
மிச்சமாக என்ன இருக்கிறது சொல்லுங்கள்?
● உப்புச்சப்பில்லாத ஒரு வாழ்க்கையை
வாழ்வதற்காகவா
உயிரைப் பணயம் வைத்து
ஓடிக்கொண்டிருக்கிறீர்கள்
அச்சாணி கழட்டப்பட்ட சக்கரத்தைப்போல
ஏதோ ஒரு திசையில் ஓடுவதால் யாருக்கு
என்ன இலாபம்?
● பணம் படைத்தவர்களின்
அதிகாரம் மிக்கவர்களின்
சூழ்ச்சியாலும் வியாபார குணத்தாலும்
நம் தேசத்தின் ஒவ்வொரு மாணவர்களும்
பந்தயக் குதிரைகளாக
மாற்றப்பட்டிருக்கிறார்கள்
நம் தேசத்தின் ஒவ்வொரு ஆசிரியர்களும்
குதிரை ஓட்டிகளாக மாற்றப்பட்டிருக்கிறார்கள்
● ஆக இந்தப் பிள்ளைகளின்
இலக்குதான் என்ன?
ஒரு மைதானத்தை ஒரே மாதிரி
ஆனால் வேகமாக
ஒரு பத்துமுறை சுற்றி வருவதா?
● குழப்பம்.
எல்லாவற்றிலும் குழப்பம்
கல்வி கலாச்சாரம் சமூக கட்டுமானம்
அனைத்துமே குழப்பப்பட்டிருக்கிறது.
● யாரோ மீன் பிடிக்க
யாராலோ குழப்பப்படுகிறது
என்ற சந்தேகம்
இன்னும் வரவில்லையா உங்களுக்கு?
● சொல்லுங்கள் உங்களைச் சுற்றி
என்ன நடந்து கொண்டிருக்கிறது – என்பதை
கவனிக்கிறீர்களா இல்லையா?
● விளைவுகளை மட்டும் அனுபவிக்கிறீர்களே
என்றாவது ஒரு நாள் விதைப்பவனைப் பற்றியும்
விதைகளைப் பற்றியும்
யோசித்துப் பார்த்திருக்கிறீர்களா!
● அடிப்பதை எல்லாம் வாங்கிக் கொண்டு
கொடுப்பதை மட்டும் பெற்றுக் கொண்டு
மறுப்பதையும் கூட ஏற்றுக் கொண்டு
என்ன மாதிரியான ஒரு வாழ்க்கையை
வாழ்ந்து கொண்டிருக்கிறீர்கள் நீங்கள்?
● ஒதுங்கித் தனித்திருத்தல் இல்லாத
வாழ்க்கையின் வலிமையைப் பற்றி
உங்களில் எத்தனை பேர்
உணர்ந்திருக்கிறீர்கள் சொல்லுங்கள்?
● ஒற்றைச் சிறகடிப்பில் விலகிப் போகும்
பறவை போல
வெறுப்பிடமிருந்தும் தோல்வியிடமிருந்தும்
முற்றும் முழுவதுமாக விடுபட்ட
அழகிய ஆர்வமூட்டும் ஒரு வாழ்வை
நீங்கள் விரும்புகிறீர்கள் இல்லையா?
● வாழ்தலின் நோக்கமே
மகிழ்ச்சியாய் இருத்தல் தானே
அந்த மகிழ்ச்சியை விரும்பும் இதயங்கள்
இங்கே எத்தனை உண்டு சொல்லுங்கள்?
● அதிகாரமிக்க விரல்கள்
கையெழுத்துப் போடும்
ஒவ்வொரு ஒப்பந்தங்களும்
ஒவ்வொரு உடன்படிக்கைகளும்
நம்முடைய வாழ்க்கையை அமைதியை
எப்படிக் குலைத்துப் போடுகின்றன என்பது
எத்தனை பேருக்குப் புரிகிறது?
● எந்த ஒரு நாட்டினுடைய
எந்த ஒரு மக்கள் கூட்டமும்
எந்த ஒரு காலத்திலும்
யுத்தங்களை விரும்பாத போது
எதற்காக நடக்கின்றன
இத்தனை யுத்தங்கள்?
● போர் விமானங்களும் கீழே
கன்னிவெடிகளுக்கு நடுவில்
ஓயாத துப்பாக்கிச் சப்தங்களுக்குப் பயந்து
வீடுகளிலிருந்து பதுங்கு குழிகளுக்கும்
பதுங்கு குழிகளிலிருந்து மரத்தடிக்குமாக
பேரச்சம் சுமந்த ஒரு பெருங்கூட்டம்
அலைக்கழிக்கப்படுவது எதற்காக?
● தாயின் சிதறிப் போன உடலை
வாஞ்சையோடு தொட்டுத் தடவும்
ஒரு குழந்தையிடம் சொல்வதற்கு
என்ன இருக்கிறது?
பிரசவத்திற்குப் பிறகு இப்போது சவமாக
இரத்தம் தோய்ந்து கிடக்கும்
குழந்தையைப் பார்க்கும்
தாயின் மனநிலை என்னவாக இருக்கும்?
● கணவனை இழந்த ஒருத்தியின் ஆற்றாமை
காதலியை இழந்த ஒருவனின் கோபம்
குடும்பத்தின் எல்லா உயிரையும்
யுத்தத்திற்கு பறிகொடுத்துவிட்டு
ஒற்றையாய் எஞ்சிநிற்கும் ஒரு இதயம்
என்ன பாடுபடும் என்பது புரிகிறதா?
● நான் நேரடியாகவே கேட்கிறேன்
எல்லா யுத்தங்களும்
எல்லா படுகொலைகளும்
யாருடைய நலனுக்காக?
யாருடைய வசதிக்காக
யாருடைய வளர்ச்சிக்காக?
ஒவ்வொரு யுத்தமும் அமைதிக்காகவாம்
அமைதியை எல்லோரும்
விரும்புகிறார்கள் போல
● வரலாறு நெடுகிலும்
தொடர்ச்சியாக நடப்பது இதுதான்
ஒரு கொலைகாரன்
இன்னொரு கொலைகாரனை உருவாக்குகிறான்
ஒரு கொள்ளைக்காரன்
இன்னொரு கொள்ளைக்காரனை உருவாக்குகிறான்
ஒரு பேராசை பிடித்தவன்
போகும் இடமெல்லாம் பேராசையை
விதைக்கிறான்
ஒரு சுயநலம் கொண்டவன்
போகும் இடமெல்லாம்
சுயநலத்தைப் பரப்புகிறான்
● ஈரம் கொண்ட இதயங்களோ
ஈன சுரத்தில் முனகிக் கொண்டு
இருக்க இடமின்றி அலைந்து
கொண்டிருக்கின்றன.
● ஆயுதங்களும், அணுகுண்டுகளும் வெறுப்பும்
வன்முறையும் அல்லவா
உலகமயமாக்கப்பட்டிருக்கிறது – இதில்
மனிதாபிமானம் எங்கே போனது
மனசாட்சி எங்கே போனது?
● கொடியவர்களின் கரங்களிலிருந்து
பொய்யர்களின் கரங்களிலிருந்து
இந்த உலகம்
விடுவிக்கப்பட வேண்டும்
● இப்பொழுதேனும் விழிக்கவில்லை என்றால்
நிரந்தர உறக்கம் தான் மிஞ்சப் போகிறது
இன்னும் நீங்கள் இறந்துவிடவில்லை
எழுந்து வாருங்கள்
● இருந்தும் இல்லாததுமான
கடனும் கண்ணீருமான
இந்த வாழ்க்கையை நீங்கள்
விரும்பவில்லை அல்லவா?
● சத்தியம் நிறைந்த உங்களின்
ஆசைகளுக்கும், கனவுகளுக்கும்
கற்பனையில் உருவம் கொடுக்க
முயற்சிக்கப் போவதில்லை நான்.
● மெய்யாகவே நீங்கள்
விரும்பும் பட்சத்தில்
உங்களால் எதுவும் செய்ய முடியும்
ஆகவே
விரும்பக்கற்றுக் கொள்ளுங்கள்.
ஆச்சாரி
இவரது மற்ற கட்டுரைகளைக் காண இங்கே சொடுக்குங்கள்.
கருத்துக்கள் பதிவாகவில்லை- “விடியலைத் தேடும் மனங்களே, விரும்பக் கற்றுக்கொள்ளுங்கள்”