மார்ச்சு 25, 2023 இதழ்
தமிழ் வார இதழ்

பழமொழிகளும் தொடர்பான அறிவியல் சிந்தனைகளும்

ஆச்சாரி

Jan 1, 2013

1.அத்தி மரத்தில் தொத்திய கனிபோல்.

2.அத்திக்காயைப் புட்டுப்பார்த்தால் அங்கும் இங்கும் பொள்ளல்.

3.அத்திப்பழத்தைப் பிட்டுப்பார்த்தால் அத்தனையும் புழு.

4.அத்திப்பழத்தைப் பிட்டால் அத்தனையும் சொத்தை.

5.அத்திப்பழத்தைப் பிட்டுப்பார்த்தால் அதற்குள்ளும் விதை இருக்கும்.

6.அத்திப்பூ பூத்தாற்போல்.

7.அத்திப்பூவை ஆர் அறிவார்.

8.அத்திப்பூவைக் கண்டவர் உண்டா?

9.அத்தி போல் துளிர்த்து,ஆலம் போல்  வாழ்ந்திருப்பர்.

இப்படிமொழிகள் அத்தி பற்றிய அறிவியல் உண்மைகளை நம்முன்னைத் தமிழ் மக்கள் நன்கு அறிந்திருந்தனர் என்பதை உணர்த்துகிறது. அத்தி பற்றிய பொதுவான செய்திகளை நாம் தெரிந்து கொள்வோம்.

பயிரினங்கள் பூத்துக் காய்த்துக் கனிவதே வழக்கம் என்றாலும் பூக்காமல் காய்க்கும் மரங்களும் உள்ளன. இவற்றைக் கோளி என்பர் பழந்தமிழர்.

*கொழு மென் சினைய கோளியுள்ளும்

பழம் மீக் கூறும் பலாஅப் போல

-பெரும்பாணாற்றுப்படை :407-408

* கோடு பல முரஞ்சிய கோளி ஆலத்து -மலைபடுகடாம் : 268

* முழுமுதல் தொலைத்த கோளி ஆலத்து  -புறநானூறு : 58.2

* முன்ஊர்ப் புழுனிய கோளி ஆலத்து      -புறநானூறு : 254.7

இவ்வாறு, பூவிலி வகைத் தாவரங்களை, ஈராயிரம் ஆண்டுகளுக்கு முன்பே சங்கப்புலவர்கள் குறிப்பிட்டுள்ளனர். மாதரி கண்ணகிக்குச் சமைக்க வழங்கிய பொருள்களைக் குறிப்பிடும் பொழுது

கோளிப் பாகல் கொழுங் கனித் திரள் காய்                 -சிலப்பதிகாரம் :16.22

என்கிறார் தமிழ் தேசியப் புலவர் இளங்கோ அடிகள்.

தேவாரப்பாடல் எண் 78 இல் எவ்விடங்களிலும் மரங்கள் நிறைந்திருப்பதாக அவற்றின் பெயர்களை அடுக்கிக் கூறும் பொழுது கோளி என்று பலா குறிப்பிடப்படுகின்றது.

பூவாது காய்க்கு மரமுள நன்றறிவார்

மூவாது மூத்தவர் நூல்வல்லார்

என்றும் சிறுபஞ்சமூலம் (22) அடியில் பூவாது காய்க்கும் மரம், ஆண்டால் மூப்பு அடையாமல் அறிவால் மூப்பு அடைவோரைக் குறிக்கப் பயன்படுகின்றது. பூவாது காய்க்கும் மரங்கள் அத்தி, ஆல், பலா, அரசு முதலியன என அறிஞர்கள் விளக்கியுள்ளனர்.

சொல்லாம லேபெரியர் சொல்லிச் செல்வார் சிறியர்

செல்லியுஞ் செய்யார் கயவரே

என்னும் பாடலடிகளை எடுத்துக்காட்டி பூவாமல் காய்ப்பது எனப் பல வகையைக் குறிப்பிடுகின்றார் அடியார்க்கு நல்லார்.

பூவாதே காய்க்கும் மரமுள மக்களும்

ஏவாதே நின்றுணர்வார் தாமுளரே

என ஔவையார், நல்வழியில் (35) பிறர் சொல்லாமல் தாமே பணி செய்வாரைக் குறிப்பிடுகையில் பூவாமல் காய்க்கும் மரத்தை எடுத்துக்காட்டாகக் கூறுகின்றார். இதற்கு விளக்கும் தருவோர் அத்தி, ஆல், பலா, அரசு போன்ற பூவாமல்  காய்க்கும் மரங்கள் என்கின்றனர். இவற்றுள் அத்தியைச் சங்கப் பாடல்களில் அதவம் என்றே குறிப்பிட்டுள்ளனர் .

அதலத் தீங்கனி அன்ன செம்முகத்

துய்த்தலை மந்தி வன்பறழ் தூங்க

என்கின்றது நற்றினை (95:3-4)

குரங்குக்குட்டியின் முகம் இனிய அத்திப்பழம் போன்று சிவந்த நிறம் எனக் கூறுவதன் மூலம் அத்திப்பழம் நிறம் சிவப்பு என இப்பாடலடி விளக்குகிறது.

ஆற்றயல் எழுந்த வெண்கோட்டு அதவத்து

என்னும் குறுந்தொகை (24.3) பாடலடி மூலம் அதமாகிய அத்தி, ஆற்றங்கரையோரம் முளைத்து வளரும், அதன் கிளைகள் வெண்மையான நிறம் கொண்டவை என்னும் அறிவியல் செய்திகள் கூறப்படுகின்றன.

பூக்காத்தாவரம் கிரைப்டோகம் (cryptogam) என ஆங்கிலத்தில் சொல்லப்படுகிறது. கிரேக்க மொழியில் இதன்பொருள் “மறைக்கப்பட்ட விதை” என்பதாகும். இதன் மூலம் விதை உற்பத்தியாகா  என்கிறது இக்கலைச்சொல். கார்ல் இலினேயசு(carl linnaeus: 1707-1778) என்னும் அறிஞ, தாவரக் குடும்பங்களை 25 வகையாகப் பகுத்து இவ்வகையையும் அதில் சேர்த்துள்ளார். 18 ஆம் நூற்றாண்டில் கண்டு உணரப்பட்ட பூவிலிக் குடும்பம் பற்றி, ஈராயிரம் ஆண்டுகளுக்கு முன்பே நம் முன்னைத் தமிழ் மக்கள் அறிந்துள்ளனர்.

அத்தியில் பல வகை உண்டு. அவை பின் வருமாறு (செந்தமிழ்ச் சொற்பிறப்பியல் பேரகரமுதலி: முதன் மடலம்: முதற்பகுதி: பக். 196-197)

1.கல்லத்தி( stone fig- ficusscandens)

2.காட்டத்தி (jungle fig- ficushispida)

3.குருகத்தி (glossy long leaved fig- ficustjakela)

4.கொடியத்தி (creeper fig- ficusrepens)

5.சிற்றத்தி (small fig- ficuspolycarpa)

6.சீமையத்தி அல்லது தேனத்தி (foreign fig- ficuscarica)

7.செவ்வத்தி( red fig- ficusheterophylla)

8.நாட்டத்தி(country fig- ficusglometra alias ficusracemosa)

9.நாயத்தி

10.நீரத்தி (yellow fig- ficuscallosa)

11.பேயத்தி(devil fig- ficusoppositifolia)

12.பேரத்தி (tall fig- ficus)

13.மரந்தின்னியத்தி (sandpaper fig- ficusasperrima)

14.மலையத்தி (mountain fig- ficusmacrocarpa)

15.விழலத்தி அல்லது ஊழலத்தி

இவை போல் வெள்ளை அத்தி, பசலத்தி, நல்லத்தி, வயமம் முதலானவைகளும் உள்ளன. அத்திக்கு “ஆழரம்” என்றும் “உதும்பரம்” என்றும் வேறு பெயர்கள் உள்ளன. வங்காளத்திலும், இந்தியிலும் “உதும்பரா” என்றும், மராத்தியில் “உதுப்பர்” என்றும், குசராத்தியில் “உம்பரா” என்றும், சமசுக்கிருதத்தில் “ஒளதும்பரா” என்றும், மலையாளம், தெலுங்கு,கன்னடத்தில் “அந்தி” என்றும் அழைக்கப்படுவதால் அத்தியின் பரவலான விளைச்சலையும், தமிழ்ப் பயன்பாட்டின் சிறப்பையும் நன்கு புரிந்துகோள்ளலாம்.

அத்திமரப்பட்டை சிவப்பு அல்லது சாம்பல் நிறத்திலும், காய்கள் நீள்முட்டை வடிவில் அடிமரம், கிளைகள், தண்டுகள் என எல்லா இடங்களிலும் கொத்துக் கொத்தாகக் காய்க்கும். அத்துதல் என்றால் ஒட்டுதல் என்று பொருள். கிளைகளை ஒட்டி காய்ப்பதால் “அத்தி” என்று வந்தது என்பர்.

அத்திப்பழம் மட்டுமல்லாமல் அத்தியின் இலை, பட்டை,பால் முதலான அனைத்துமே மருந்தாகப் பயன்படுவன. அத்திபழத்தை நாள்தோறும் உண்டால் சீரான குருதி ஓட்டம் ஏற்படும். எனவே குருதி அழுத்த மாறுபாடு உள்ளவர்களுக்குப் பெரும் பயன் அளிக்கும். நீரழிவு (சருக்கரை) நோய், மூலநோய் ஆகியவற்றைக் குணப்படுத்த அத்திவேரில் இருந்து எடுக்கப்படும் அத்திக்கள்  மருந்தாகப் பயன்படும். அத்திக்கள்ளிற்க்கு அத்திப் பதநீர் என்றும் பெயர்.

அத்தி மரத்தடியில் குத்தி எடுக்கும் அத்திப்பாலும், மருத்துவப் பயன்கள் உடையது. சிலப்பதிகார (6:7) உரையில் ஆல், அரசு ,அத்தி, இத்தி ஆகிய நால்வகை மரங்களில் பால் மிகுதியாக உள்ளமையால் இவை நாற்பால் மரங்கள் எனச் சொல்லப்படுவதைத் தெரிவிப்பதால், அத்திப்பாலின் சிறப்பை அறியலாம், இவை போன்ற மிகுதியான மருத்துவப்பயன்களைத் தமிழ் மருத்துவ இலக்கியங்கள் மூலம் நாம் அறிந்து கொள்ளலாம்; தமிழ் மருத்துவர்கள் மூலம் தேவைகேற்பப் பயன்படுத்தி நல்வாழ்வு வாழலாம்.

பூவிழி என்பது பூச்சூனியம் என்றும் அழைக்கப்பெற்றுப் பின்னர்  புட்சூனியமாக மாறி உள்ளது. புட்ப சூனியம் என்பதற்கு அத்தி, ஆல், முதலிய மலரில்லா மரவகை என அகராதிகள் விளக்குகின்றன. பூவாமல் காய்க்கும் வகையைச் சேர்ந்த அத்தியைப்பற்றி குறிப்பிடுகையில், அத்தி பூத்தாற்போல் என்றும், அத்திப்பூவை யாரறிவார் என்றும் அத்திப்பூவைக் கண்டவர் உண்டா என்றும் கூறுவதேன்?

பூவாத் தாவரங்களாகிய கோளிகளை விளக்கும் அறிவியல் அறிஞர்கள் இவை பூக்கும் தன்மை இல்லாத பூக்களை உடையன. அத்திப்பூவும் அத்தன்மையதே என்கின்றனர். அத்திப்பூ எபோழுதாவதுதான் பூக்கும் என்பதை உணர்த்தவே எப்பொழுதோ காணப்படும் ஒன்றை அல்லது செய்யப்படும் ஒன்றை விளக்குகையில் அத்திப்பூ பூத்தாற்போல் என்று கூறுவதாகக் கருதுகின்றனர்.கொத்துக் கொத்தாக அத்திக்காய்கள் தொங்குகையில் எப்பொழுதோ பூக்கும் பூவை அறியும் வாய்ப்பு குறைவு என்பதால், அத்திப்பூவை யாரறிவார் என்று சொல்கின்றனரோ? என்றும் எண்ணத் தோன்றும், உண்மையில் இதில் அறிவியல் உண்மை உள்ளது. பூக்கள் நுண்மையானவையாகவும் , எண்ணிறந்தவையாகவும் மஞ்சரிக்குடத்தின் உட்பக்கத்தில் ஒட்டிக் கொண்டு வளரும். எனவே, வெளியே பார்வைக்குத் தெரியாது. இவ்வாறு அத்திப்பிஞ்சிற்குள் கொத்துக் கொத்தாக அத்திப்பூ இருப்பதால் காய்களுக்குள் இருக்கும் பூவை யாரும் அறிய முடியாது என்ற பொருளிள் வந்ததே இப்பழமொழிகள்.

அத்திப்பூக்களில் ஆண்பூ , பெண்பூ, மலட்டுப்பூ (gall flower), அலிப்பூ (natural sterile or mule flower) என நால்வகை உண்டு. பழுத்த அத்தி பச்சை, சிவப்பு, கருப்பு, பழுப்பு,மஞ்சள், எனப் பல நிறத்தை உடையது. அத்திமரப் பூக்களில் வளரும் சிறு குளவியே அத்திப்பூச்சி எனப்படுகிறது. இப்பூச்சியின் வாயிலாகவே அயல் மகரந்தச் சேர்க்கை நடைபெறுகிறது. அத்திப்பழம் நறுமணமாக இருக்குமே தவிர, அத்திக்காய்க்குள் பூக்கள் அமைவன போல் அதற்குள் மெல்லிய பூச்சிகள், புழுக்கள் இருக்கும். எனவே தான் அத்திப்பழத்தைப் பிட்டுப் பார்த்தால் அத்தனையும் சொத்தை அல்லது புழு; அத்திக்காயைப் பிட்டுப்பார்த்தால் அங்கும் இங்கும் பொள்ளல் என்னும் பழமொழிகள் வந்தன.

பெண்பூவிலிருந்து சதைப்பற்றுள்ள சிறு கனி உருவாகும். அதனையே விதை என்பர். அத்திப்பழம் சொத்தையாக இருந்தாலும் விதை இருக்கும் என்பதை அத்திப்பழத்தைப் பிட்டு பார்த்தால் அதற்குள்ளும் விதை இருக்கும் என்னும் பழமொழி விளக்குகிறது. அத்திபோல் துளிர்ந்து ஆலமரம் போல் வாழுமாறு வாழ்த்தும் பழமொழி அத்தி செழுமையாகத் துளிர்ப்பதை விளக்குகிறது.

பழமொழிகள் வாயிலாக அறிவியல் உண்மைகளை உணர்த்துவதில் இவை இயல்பாக அனைவரும் அறிந்த அறிவியல் செய்திகளாக இருந்துள்ளன எனலாம். அறிவியல் தமிழ் செழிக்கட்டும். Etymology placed within brackets, the etymology uses capital abbreviations for languages and lowercase abbreviations for other words www.buyessayonline.ninja thus me middle english, of old french, l latin, fr


ஆச்சாரி

இவரது மற்ற கட்டுரைகளைக் காண இங்கே சொடுக்குங்கள்.

3 கருத்துக்கள் பதிவாகியுள்ளது- “பழமொழிகளும் தொடர்பான அறிவியல் சிந்தனைகளும்”
  1. மு.செந்தமிழன் says:

    பழமொழிகளை அறிவியல் பார்வையில் வெளியிடுவது அருமையாக உள்ளது. ஆனால், அகர வரிசை மட்டும்தானே உள்ளன. பிறவற்றையும் வெளியிட்டால் சிறப்பாக இருக்கும்.

  2. aranganathan says:

    Very nice

  3. kathir says:

    அருமையான தகவல்களைப் பகிர்ந்த சிறகுக்கு நன்றி… ஆங்கிலப் புத்தாண்டு வாழ்த்துகள்!

அதிகம் படித்தது